Qendra ASET ka realizuar me përkushtim trajnime gjithëpërfshirëse dhe interaktive me  fëmijët që jetojnë në institucione rezidenciale në Tiranë dhe Sarandë, si dhe me fëmijët në Qendra që ofrojnë shërbime për fëmijët në situatë rruge në Tiranë dhe Shkodër, me synimin për të fuqizuar dhe ndërgjegjësuar ata mbi të drejtat e tyre.

Këto trajnime janë hartuar dhe zhvilluar sipas metodës ndërkombëtare Compasito, e cila është manuali i njohur për edukimin për të drejtat e njeriut me fëmijët. Duke përdorur teknika të edukimit joformal dhe metoda praktike të provuara, trajnimet kanë përfshirë lojëra, punë në grupe, diskutime të drejtuara dhe ushtrime krijuese që nxisin mendimin kritik dhe shprehjen e lirë të ideve.

Përmes aktivitetit të strukturuar sipas Compasito, fëmijët janë njohur me të drejtat e tyre duke mësuar për përgjegjësitë e institucioneve dhe të rriturve ndaj tyre dhe janë udhëzuar mbi mënyrat praktike se si të kërkojnë ndihmë ose të shprehin shqetësimet e tyre.

Në institucionet rezidenciale të kujdesit në Tiranë dhe Sarandë, trajnimet kanë synuar të thyejnë ndjenjën e izolimit, të rrisin vetëdijen dhe të ndërtojnë besimin tek stafi dhe strukturat mbështetëse. ASET ka punuar në bashkëpunim të ngushtë me punonjësit e institucioneve për të garantuar një qasje të ndjeshme dhe respektuese ndaj të drejtave të fëmijëve.

Për fëmijët në situatë rruge në Tiranë dhe Shkodër, trajnimet kanë krijuar hapësira të sigurta dhe mikpritëse ku ata kanë mundur të ndajnë përvojat e tyre, të mësojnë të drejtat që u takojnë dhe të zhvillojnë aftësi jetësore dhe sociale. Nëpërmjet aktiviteteve sipas metodës Compasito, ata janë inkurajuar të shprehin dëshirat dhe shqetësimet e tyre dhe të ndërtojnë ura komunikimi me shërbimet sociale dhe komunitetin.

Qendra ASET mbetet e përkushtuar të vazhdojë ofrimin e këtyre programeve që fuqizojnë fëmijët dhe mbrojnë të drejtat e tyre, duke kontribuar në ndërtimin e një shoqërie më të drejtë dhe gjithëpërfshirëse.